Dʼar Meurzh 23 a viz Cʼhwevrer ez eus bet aozet gant Brezhoweb un diviz diwar-benn an treuzdougen e Breizh hag efedoù al Linenn Tizh Bras nevez. Pedet e oa bet Trefina Kerrain e anv UDB Yaouank, Malo Bouëssel du Bourg e anv Produet e Breizh, Olwen Denez e anv ar Re Cʼhlas ha Gerard Lahelleg, eil-prezidant e karg eus an treuzdougen, e anv Rannvro Breizh.
Hervez Trefina Kerrain, mouezh-aotreet an UDB Yaouank (aozet ganto warlene ur gerzhadeg evit goulenn ma vo digoret en-dro al linenn hent-houarn etre An Alre ha Sant-Brieg), e vefe bet talvoudusocʼh implij ar milionoù a euroioù dispignet gant strollegezhioù Breizh el LTB evit digeriñ en-dro linennoù diabarzh e Breizh, dreist-holl etre an Norzh hag ar Su. « Dazont ar Vretoned ne zlefe ket bezañ mont da Bariz nemetken » emezi. Ret eo digreizennañ galloud ar Stad C’hall evit ma vo krouet raktresoù talvoudus evit ar Vretoned gant Rannvro Breizh.
